GENERAL SANTOS CITY – Laing nalambigit sa ilegal nga droga ang nasikop sa Philippine Drug Enforcement Agency (PDEA) 12 sa kooperasyon sa kapulisan sa dakbayan sa gipahigayon nga buy-bust operations sa Brgy. Fatima, ning syudad.
Unang nasikop sa miaging adlaw si Arfe Deguma alyas Arping, 26 anyos nga walay trabaho ang napalitan ug dahon sa mariwana nga giputos sa newspaper.
Sunod nga nasikop sa laing operasyon mao si Bryan Dale Doloricon, 21 anyos, estudyante nga napalitan usab og mariwana.
Nasuta nga ang duha ang namaligya sa iligal nga druga pinaagi sa social media.
Samtang may nasikop usab ang kapulisan sa gipahigayon nga buybust operation.
Duha ka target suspek ang nasikop human makuhaan ug mga putos sa gituhu-ang shabu.
Mukabat sa P3,000 ang kantidad sa gituhuang shabu ang nakuha sa usa ka broker sa fishport nga nakigsabut sa pulis nga nagpakaron-ingnon nga buyer.
Giila ang nahisgutan nga si Roger Roa, 52 anyos, fish broker nga taga Purok Ondok Gawan, San Jose niining syudad.
Samtang sikop usab ang kauban niini nga nagpangalan ug Zorayda Silungan 32 anyos nga residente sa Bulaong village, labangal ning syudad.
Nakuha gikan sa ikaduha nga suspek ang kantidad sa P11,000 nga gituhuang shabu .
