GENERAL SANTOS CITY – Subling gihingusgan ni Senator Manny Pacquiao nga wala pa niini gihunahuna karon ang kabahin sa pulitika inay gitutukan ang pagtabang sa mga katawhan.
Matud pa sa senador, daghan sa mga tawo ang nagkalisod og gigutom hinungdan nga angayang tabangan.
Sa pamahayag sa fighting senator ayha na siya maghisgot kalabot sa pulitika tungod layo pa ang sunod nga piniliay sa nasud.
Nasuta nga base sa gipahigayong independent survey sa OCTA Research sa 1,200 respondents kaniadtong Enero 26-Pebrero 1, pareho si Sen. Pacquiao og Davao Mayor Sara Duterte-Carpio ang top contender alang sa presidential og vice presidential elections sa May 2022.
Anaa sa 22% sa mga respondents ang gipili si Inday Sara nga mamahimong sunod nga pangulo sa nasud samtang 12% ang nakuhang boto ni Pacquiao.
Samtang, sa vice presidential race, nagpanguna gihapon ang pangalan ni Duterte, nga may 14% survey votes nga gisundan nilang Pacquiao ug Manila City Mayor Isko Moreno nga tabla sa 11%.
Bisan alang sa senatorial race, nanguna ang pangalan ni Pacquiao nga naka-kuha og 57% nga pag-uyon gikan sa mga respondents.
Kagahapon dihang nanghatag si Sen. Pacquiao og food packs, 8 kilos nga bugas, og P1,000 cash atol sa pagbisita niya sa Brgy Fatima ning syudad.
