GENERAL SANTOS CITY – Mainitong gisugat si Interim WBC Bantamweight Champion Reymart “The Assasin” Gaballo sa iyang mga kababayan sa pag-uli niini sa iyang hometown sa Polomolok South Cotabato.
Usa ka motorcade ang gipahigayon alang kang Gaballo kuyog ang mga empleyado, mga personahe og tag-as nga opisyal sa munisipyo kung asa milibot sa mga nag-unang kadalanan sa lugar.
Kahibaluan nga na-angkon ni Gaballo ang kadaugan kaniadtong nakalabay nga bulan sa engkwentro batok sa Puerto Rican boxer Emmanuel Rodriguez via split decision.
Nagpasalamat ang Polomolok boxer sa mga misuporta kaniya. Dakong hagit ang pakigsangka ni Gaballo kang Rodriguez tungod usa ka semana lang ang iyang nahimong pagpangandam una ang ilang engkwentro.
Gibutyag nga Disyembre 31 dihang nakaabot sa GenSan gikan sa Amerika og nakauli na sa iyang pamilya sa Barangay Polo sa nasangpit nga munisipyo.
Si Gaballo, kasamtangang may boxing record 24 wins, 20 Knockout og walay pildi.
