GENERAL SANTOS CITY – Mukabat sa P8.1 billion ang pondo sa Department of Social Welfare and Development sa social services karong tuiga kung asa mahiadto ang dakong parte sa pundo alang sa mga panginahanglanon sa mga kabus nga pamilya sa Rehiyon Dose.
Matud kang DSWD 12 Regional Director Cezario Joel Espejo, sa maong pundo P5.9 billion ang para sa monthly grants sa mga benepisyaryo sa Pantawid Pamilyang Pilipino Program, samtang ang P122.2 million alang sa Sustainable Livelihood Program pinaagi sa paghatag ug seed capital sa mga benepisyaryo sa livelihood projects.
Ang duha ka programa sa ahensya ang nagtumong nga mahaw-as sa kalisud ang mga kabus nga mga pamilya sa rehiyon.
Gipaniguro usab ni RD Espejo nga dili niini kunsintihon ang ilang mga empleyado nga gamiton sa dili sakto ang pundo.
Pahayag usab ni DSWD 12 Budget Chief Mohammad Fayed Sarip nga ang alokasyon sa social services karong tuiga, nalakip ang P 1.6 billion Social Pension Program para sa mga indigent senior citizens nga makabaton ug P500.00 monthly stipend.
Anaa usab sa P186.4 million ang gigahin sa Supplementary Feeding Program, usa usab ka programa sa ahensya uban ang Local Government Units pinaagi sa paghatag ug hot meals sa mga kabataan sa lima ka adlaw matag semana sulod sa 120 ka adlaw.
