GENERAL SANTOS CITY– Mapasalamaton ang usa ka Pinay caregiver nga kasamtangang anaa sa Israel nga wala siyay unsa mang gibati nga dili maayo sa iyang lawas human nga nabakunahan og COVID19 vaccine.
Sa pakighinabi kang Bombo International Correspondent Julie Cariedo nga residente sa Brgy Apopong ning dakbayan, gibutyag niini nga 2 shots na sa bakuna nga hinimo sa Pfizer ang nadawat apil sa giatiman niini nga usa ka 93 anyos.
Gibutyag niini nga susama lamang sa flu vaccine ang pagturok sa ilaha sa bakuna kung asa nakasinati og kasakit sa bukton apan walay grabeng side effects nga gibati sama sa hilanat og uban pa.
Sa pamahayag ni Cariedo, sukad kaniadtong Disyembre nga naturukan ang iyang alaga og bakuna kontra sa COVID 19 kanunay na niining ginamonitor ang nasampit hilabi na nga may problema sa baga apan kaluy-an sa Ginoo walay unsa mang dautan nga reaction sa panglawas ang nahitabo.
Gibutyag ni Cariedo nga ang igsuon niya nga nagtrabaho sa Nursing home, ang asawa niini og ang duha ka ig-agaw nga anaa usab sa Israel ang nakadawat na sa 2 shots sa COVID 19 vaccine og okey ang ilang mga kondisyon og walay nasinatiang mga dautang side effects.
Unang semana sa Disyembre nag-abot ang COVID 19 vaccine sa Israel kung asa unang giturukan si PM Benjamin Netanyahu og gi-live kini sa telebisyon.
Sunod nga giturukan ang mga frontliners, mga anaa sa Nursing homes hilabina ang mga edaran og dayon kadtong mga nag-atiman og mga tigulang nga anaa lang sa balay.
Sa karon gipatuman ang lockdown tungod sa nagkataas nga kaso sa COVID 19 apan ang mga tawo ang dili makontrola kung asa mas daghan ang wala gasunod sa mga health protocol.
Hinuon ang mga OFWs sa Israel ang dili mga pasaway og kanunay nga ga-amping pinaagi sa pagsul-ob ug face mask.
