GENERAL SANTOS CITY– Gikatakda nga i-turn over sa Philippine Eagle Foundation sa Davao City ang ikatulo nga Philippine Eagle human kini nga nakaplagan sa Sarangani Province.
Nasuta nga na-rescue sa usa ka nagpangalan og Ganang, 43-anyos gikan sa Salbanog Falls, Barangay Ticulab, Maitum ang maong agila alas 2 sa hapon kaniadtong adlaw nga Biernes.
Gilayon usab nga nagpadala og team si Mayor Bryan Reganit aron ma-retrieve ang agila og gipahibalo ang Community Environment and Natural Resources Office kalabitan niini alang sa hustong pag-atiman sa agila.
Kahinumduman nga kaniadtong Enero 2, 2017, usa ka gamay pa nga Philippine Eagle ang nakit-an ni Gibson Badal, residente sa Barangay Batian nga anaa sa sulod sa Mt. Busa complex, nga gideklara nga nag-unang biodiversity area og mahinongdanong lugar alang sa mga langgam.
Kaniadtong December 13, 2019, ang ikaduhang Philippine Eagle ang na-rescue sa Sarangani Province partikular sa Barangay Lumatil, Maasim sa pamilya Kamal.
Nanawagan ang mga opisyales sa Maitum sa mga residente kung aduna makaplagan nga agila o unsa mang mananap nga gikonsidera nga endangered na ang gilayong iturnover sa mga otoridad.
