GENERAL SANTOS CITY – Adunay tips og pahimangno ang kapulisan dinhi sa dakbayan aron malikay sa unsa man nga krimen una ang pagsugat sa bag-ong tuig.
Matud pa ni P/Col. Gilberto Tuzon, City Director sa General Santos City Police Office (GSCPO) nga kun mahimo dili biyaan ang balay nga walay tawo apan kun adunay lakwan kinahanglang kanunay nga naka-kandado ang mga pultahan og sirado ang mga bintana.
Kung mamalit sa establismiento, mall, palengke o asa nga lugar, angayang mahimong alerto og mag-igmat sa tanang higayon.
Likayan ang magdala og dakong kantidad sa salapi.
Ang pitaka og bag nga dalhon ang angayang makabutang kanunay nga atubangan nga bahin sa lawas og dili sa likod o kilid aron makalikay sa kawat.
Samtang kung adunay sakyanan, siguruhon nga naka-lock ang pultahan og mga bintana og iparada sa hayag nga bahin.
Una biyaan ang sakyanan, sigurhon nga nakatago ang mga gipamalit samtang dili ibilin ang mga mahinongdanong gamit sama sa cellphone, alahas, kwarta og uban pa.
Gikadugang pa ni Col. Tuzon, dili kalimtan ang pagsunod sa mga minimum health protocol aron malikayan ang Covid 19.
