GENERAL SANTOS CITY – Nagtutok karon ang San Isidro Police Station sa motibo nga may kalabutan sa gidiling droga sa pagpusil patay sa usa ka kanhing priso sa residente sa Promise Land 2, Brgy. Mabuhay ning dakbayan.
Matud ni Police Capt. Brent Ian Salazar, Chief of Police sa San Isidro PNP nga subay matud pa sa gihimo nilang pagsuta sa background sa biktima nga si Hernando Artigo, 53 anyos nga nadakpan kini gumikan sa illegal ng droga.
Nasuta nga samtang sa sulod sa Lanton Reformatory Center, nakuhaan usab ug shabu atol sa Oplan Galugad sa Philippine Drug Enforcement Agency (PDEA) 12.
Aduna usab kaso kaniadto nga pagsupak sa Republic Act 9262 o Violence Against Women And Children.
Apan wala gipadaplin sa kapulisan ang uban pang anggulo sa krimen og sa karon gisuta gikan sa pamilya kung adunay nakalaban ang biktima una napusilan-patay ang biktima.
Gibutyag ni Salazar wala pa silay matumbok nga person of interest sa maong krimen, apan padayon ang ilahang ginahimo nga imbestigasyon.
Nasuta nga magpalit lang unta ang biktima og sud-an sa palengke sa naasoyng lugar dihang gipusil sa riding in tandem suspek.
Kahibaluan nga naka-angkon ug igo pinusilan sa ulo ang biktima nga hinungdan sa iyahang kamatayon.
Narekober sa crime scene ang mga basyo sa kalibre 45 nga armas nga maoy gigamit sa krimen.
