GENERAL SANTOS CITY – Nakig-alayon karon ang kapulisan sa San Isidro ngadto sa mga establismiento aron makakuha og CCTV footage may kalabotan sa pagpamusil sa usa ka negosyante sa Salvani St., Block 8, Baràngay City Heights ning dakbayan.
Kahinumduman nga sa nakalabay nga adlaw dihang gipusil si Melvin Empillo Romero, 40 ànyos atubangan mismo sa iyang pinuy-anan.
Ang biktima niuli gikan sa simbahan kauban ang asawa una pa kini gitiro sa riding in tandem criminals.
Nasuta nga ang balay sa biktima atbang lamang sa usa ka tulunghaan og aduna pay daghang establisiemento sa palibot.
Gawas sa makuhang CCTV footage makatabang usab sa pag-ila sa mga suspek og pagtumbok sa motibo sa krimen ang testimonya sa usa ka tig-baligya og isda.
Luyo nga blangko ang pamilya sa motibo sa pagpamusil sa biktima apan hugot ang pakig-alayon ngadto sa kapulisan aron masulbad ang krimen.
Sa pagkakaron, kritikal ang nasampit sa usa ka pribadong tambalanan sa dakbayan tungod sa naangkong samad pinusilan sa ulo og uban pang parte sa lawas.
Si Romero, ang gikanayong gasuplay og sex toys, may ukay-ukayan og sari-sari store ang ikalimang biktima sa shooting incident sa dakbayan ning bulana sa Disyembre.
