GENERAL SANTOS CITY – Gitan-aw sa Makar Police Station nga dakong tabang sa ginahimong follow-up investigation sa nakuha nga kopya sa mga video footages gikan sa mga namuntar nga closed-circuit television cameras sa mga establisyemento duol sa lugar kung asa nahitabo ang pagpusil kang Freya Joy Cuevas, 27-anyos.
Matud pa ni P/Col. Gilbert Tuzon ang labaw sa kapulisan sa syudad nga padayon pang gipa-istodyohan ang CCTV footages aron makakuha og impormasyon hilabina sa mga suspek og motibo sa pagpatay sa negosyanteng biktima sa Barangay Apopong, niadtung December 2.
Sa pamahayag sa opisyal nga aduna nay lig-ong ebidensya ang otoridad og persons of interest sa krimen.
Kahibaluan nga nakalabay nga adlaw, namahayag ang kapulisan nga aduna na silay mga testigo og ebidensya kalabot sa krimen.
Nasayran nga una pa ang insidente nakadawat na og bahad sa kinabuhi ang biktima kaniadtong Hulyo kung asa makita usab kini sa mikatag nga screenshot sa post niini sa social media.
