GENERAL SANTOS CITY – Natanggong karon sa selda sa Polomolok PNP ang 61 anyos nga lalake human nga gisulayan og lugos ang usa ka 19 anyos nga babaye.
Giila ni Police Capt. Randy Apostol, deputy station commander sa Polomolok PNP, ang suspek nga si Miguel Beghanilum nga taga Polomolok South Cotabato.
Base sa imbestigasyon nga namatikdan sa suspek nga nag-inusara sa balay ang maong biktima human milakar ang ginikanan, gilayon kini misulod.
Wala nalisdan ang lalake nga makasulod sa balay gumikan payag-payag ang gipuy-an niini.
Apan maisogon nga misukol ang babaye og sa dihang wala nahinayon ang tumong gisaksak sulod sa 15 ka higayon.
Gibutyag nga nakapangayo og tabang ang biktima hinungdan nga midagan si Beghanilum.
Hinoon wala hingpit nakatago ang suspek human nga nakit-an sa mga pulis.
Matud pa ni Capt. Apostol nga si Beghanilum, kanhi bilanggo gumikan sa kasong double murder.
Nakagawas ang nasampit sa prisohan human ang 17 ka tuig sa dihang nahatagan og parole.
Gibutyag ni Beghanilum nga blangko ang iyang huna-huna sa dihang gihimo ang sa ingon.
Gawas pa niini may narekober usab ang mga pulis og pakete sa gituohang shabu gikan sa suspek.
Ang kasong atubangon niini mao ang kasong attempted rape, frustrated homicide og pagsupak sa balaod sa ilegal nga droga.
