GENERAL SANTOS CITY – Sulod sa duha ka bulan nga gisuspende ang duha ka empleyado sa Sarangani Province human nga nadakpan nga natulog nga adunay ilimnon sa kilid sa sakyanan.
Matud kang Engr. Gerald Faciol, Assistant Provincial Administrator sa probinsya, giila ang mga nasangpit nga si Ram Anthony Manlangit og Nilo Delgado kansa adminstrative aide sa Environmental Conservation and Protection Center (ECPC) nga pulos mga job order employees.
Migawas sa imbestigasyon sa investigating commitee nga adunay basehan ang gipakanaug nga desisyon tungod adunay nabuhat nga kalapasan ang duha subay sa RA 6713 o Code and Ethical Standards of Public Officials and Employees.
Kahinumduman nga sa kaniadtong nga bulan gipadala si Manlangit og Delgado sa Maitum aron magpahigayon og GPS-Geo Tagging sa pipila ka barangay sa maong munisipyo gamit ang Toyota Hilux.
Apan nakaplagan na lamang sa kilid sa dalan ang maong sakyanan og nakit-ang nangatulog ang duha nga adunay ilimnong makahubog.
Ang maong panghitabo ang dili maayong tan-awon nga rason nga gisuspende ang mga nasangpit sulod sa duha ka bulan.
