GENERAL SANTOS CITY – Gibisita ni Police Brig. Gen. Michael John Dubria, PRO-12 Regional Director ang haya sa pulis nga namatay sa operasyon sa Arakan North Cotabato.
Matud pa ni Police Lt. Col. Lino Capellan, tigpamaba sa PRO-12 nga personal nga giduaw ni Brig.Gen. Dubria ang haya ni Police Staff Master Sgt. Rofel Manuel nga nakabase sa Arakan Municipal Police Station.
Namatay ang nasampit human nga napusilan sa ilang target sa operasyon niadtong nakaabayng adlaw.
Gibutyag ni Capellan, atol sa pakig-atubang ni Dubria sa pamilya gitunol sa opisyal ang pagbangutan sa han-ay sa PNP sa nahitabo kang Manuel nga mihimo lamang sa iyang trabaho.
Gipahibalo usab ni Dubria sa nahibiling pamilya sa mga benepisyo nga angayan nilang makuha human sa nahitabo sa nasangpit nga pulis.
Kahinumduman nga dihang gi-serve ni Manuel og uban sa iyang tropa ang warrant of arrest sa suspek nga adunay kasong murder apan kini naunhan ug pusil sa suspek.
Samtang patay usab ang suspetsado human napusilan sa mga kaubanan ni Manuel.
Gidala pa sa ospital ang duruha apan parehong gideklara nga dead on arrival.
