GENERAL SANTOS CITY – Gamiton sa probinsya sa Sarangani sa kampanya aron makalikay sa coronavirus ang kasinati-an ni Malapatan Mayor Salway Sumbo.
Kini ang nahimong pahayag ni Governor Steve Chiongbian-Solon dungan sa pagpadangat ug pagtimbaya sa mayor human nalagpasan ang 23 ka adlaw nga pakigbugno sa makamatay nga virus.
Himuon nga ehemplo sa gobernador ang maut nga kasinati-an ni Mayor Sumbo aron ipaklaro sa publiko nga aduna gayud coronavirus nga mutakboy sa bisan kinsa nga indibidwal.
Sa mga awareness drive batuk sa coronavirus magamit ang mayor aron iasoy ang mga kasinati-an samtang nag-inusara sa iyang lawak.
Una nga gisaysay ni Mayor Sumbo nga tulo ka adlaw kini nga nakigbatok sa kamatayon human maglisod sa pagginhawa mao nga gibutangan ug tubo nga mokonekta sa iyang baba hangtud sa iyang kahiladman.
