GENERAL SANTOS CITY – Gilikay likayan ni South Cotabato Governor Reynaldo Tamayo Jr ang pagturn over sa Socsargen General hospital ngadto sa Department of Health.
Kini ang nahimong pahayag ni Vice Governor Vic de Jesus nga nagmagahe ang gobernador human gibutyag nga may MOA sa probinsya ang naasoy nga tambalanan.
Matud ni de Jesus nga walay nasupak nga balaud nganong dili iturn over ni Tamayo sa DOH ang tambalanan aron magamit na kini sa katawhan.
Gani wala matud pa gisunod sa gobernador ang gipirmahang balaud ni Pangulong Rodrigo Duterte. Gani niining tuiga gigahinan ug P49M ang naasoy nga tambalanan nga adunay 600 bed capacity nga napatik pa sa General Appropriations act samtang sunod tuig mahimo na nga usa ka bilyon ka pesos ag igahin nga pundo.
Gipaklaro niini nga third level ang naasoy nga hospital nga mudawat sa mga pasyente gikan sa silingan nga probinsya sa Sarangani, Sultan Kudarat, ug General Santos City.
Kahinumduman nga miaplia ang Regional Development Council pinaagi sa Chairman nga si Mayor Ronnel Rivera kang Governor Reynaldo Tamayo nga itugyan na ang naasoy nga hospital sa Department of Health.
Gikadugang pa sa Vice Governor nga sa kasamtangan ang South Cotabato na lamang ang walay regional hospital nga magamit.
