GENERAL SANTOS CITY – Epektibo na sugod alas 10:00 kagabie ang localized lockdown sa pipila ka parte sa Brgy. Apopong ning syudad.
Sa pakighinabi sa Bombo Radyo, gibutyag ni City Administrator Arnel Zapatos nga paspas ang gihimong aksyon sa lokal nga gobyerno kauban ang lokal nga panggamhanan sa Brgy. Apopong tungod sa duha ka bag-ong kaso sa COVID-19 nga natala sa lugar ug uban pang posibleng suspect cases nga gina-monitor.
Ang bag-ong mga nagpositibong pasyente ang gilayong gidala sa tambalanan. Sa pamahayag ni Atty. Zapatos nga dakong tabang sa pakigbatok sa covid 19 ang kooperasyon sa tanang residente.
Ang mga lugar nga maapektuhan mao ang Purok 11 og Bagangga Apopong. Ang maong lockdown ang ipatuman aron masiguro nga makapahigayon ug contact tracing.
Ang tanang mga essential workers nga nakapuyo sa maong lugar nga posibleng carrier sa maong virus dili maka-adto sa mga essential industries ug businesses sa siyudad.
Tumong usab nga mapungan ang posibleng pagkatag sa virus ug maputol ang chain sa impeksyon.
Ang LGU GenSan ug LGU Apopong ang manghatag ug pagkaon, supplies ug mga kinahanglan nga tambal sa mga apektadong pamilya.
