GENERAL SANTOS CITY – Nakasumiti na sa counter affidavit ang mga opisyal sa Alabel-Maasim Credit Cooperative (ALAMCO) sa mga kaso nga gipasaka batok kanila.
Matud ni Kagawad Edmar Yumang nga kini human gikasuhan sa mga residente sa dakbayan ang maong investment scam.
Gibutyag ni Yumang nga may kabahin kini sa iyang mga kliyente nga nagpasaka og reklamo batok sa ALAMCO.
Nasayran nga ang ubang korte ang may giisyu na usab nga warrant of arrest batok sa mga opisyal sa maong investment scam.
Gumikan niini panawagan si Kagawad Yumang sa mga nabiktima sa ALAMCO nga angayang pasakaan ang mga nalambigit sa maong kahiwian.
Samtang sa bahin sa nadakpan nga empleyado sa NMC trading, iyang gibutyag nga angayang masikop ang founder sa maong grupo nga si Jun Sanchez.
Kini gumikan ang founder ang maoy utok sa tanan nga nakakwarta og dako human nangilad sa katawhan.
Gibutyag usab niini nga sa pagkadakop kang KAPA founder Joel Apolinario lakip ang iyang asawa nga si Reyna og mga kaubanan ang, usa ka kahigayonan nga tubagon ang alegasyon batok kanila.
Nakapuntos ang mga nailad sa KAPA gumikan walay pyansa ang mga kasong giatubang niini sama sa syndicated estafa.
Pagpaklaro pa ni Yumang nga kadtong nagpasaka og kaso sa mga nalambigit sa scam ang mahatagan og balik sa kwarta sa gobyerno gikan sa mga gi-freeze nga mga propiedad sa mga investment scams.
