GENERAL SANTOS CITY – Gikalipay sa mga residente ang pagtangtang na sa lockdown sa Central District sa Barangay Apopong ning dakbayan.
Kahibaluan nga nagpatuman ug localized lockdown ang Apopong sa siyam ka Purok sa New Society ug pito ka Purok sa Sto. Niño, gisiradhan usab ang mga agi-anan paingon sa Yu Village, Bagangga ug uban nga dalan kini tungod nagpositibu sa coronavirus disease ang usa sa residente sa lugar.
Matud pa kang Barangay Kapitan Paolo Natividad nga 40 ang ilang naapil sa contact tracing nga direktang nahimamat sa magtutudlo nga nagpositibo sa CoVid-19.
Mukabat 28 kanila ang naka-quarantine na karon sa New Society Elementary School.
Una nang gikumpirma ni Kapitan Natividad nga residente sa Polomolok South Cotabato ang nahisgutang magtutudlo apan sa New Society Apopong kini nagatudlo.
Miatender matud pa kini ug usa ka party didto sa Polomolok ug makahimamat ang usa sa nagpositibu sa makamatay nga sakit.
Gilayon matud pang gidala sa usa ka tambalanan ang nahisgutan sa mga naka PPE nga medical workers.
