GENERAL SANTOS CITY – Gihingusgan ni Rochelle Morido focal person sa Deped Sarangani nga ang Sarangani National Sports Academy kon SANSA ang labing una nga sports academy sa tibook Pilipinas.
Matud pa niini nga andam na ang maong pasilidad sa pagsugod sa klase sa Agosto 24, 2020 kung asa 75 ka mga estudyante ang na-enroll nga mao usab ang ilang target nga maangkon sa enrollment.
Gibutyag niini nga adunay mga estudyante ang mahiligon sa paugnat sa kusog hinungdan nga giablian ang SANSA nga usa ka regular high school special program.
Ang usa sa mga trainer sa SANSA mao ang Olympian nga si Henry Dagmil sa natad sa athletics.
Dugang pa ni Morido nga kasagaran sa mga estudyante ang gikan sa Alabel Sarangani Province kung asa libre ang ilang pagtuon nga sa buntag nakasentro sa academics og sa hapon ang training.
Apan gumikan sa pandemic dili tugtan ang face to face nga klase kung asa hugot nga ipatuman ang mga health protocols.
