GENERAL SANTOS CITY – Mukabat na sa 523 ang nasikop sa Sarangani Provincial Police Office (SPPO) gikan sa bulan sa Enero hangtud Hunyo 25, 2020.
Base kini sa data nga gipagawas ni Col. Michael Libanan , OIC Provincial Director nga ang mga nadakpan adunay warrant of arrest ug ang uban naaktuhan sa pagbuhat ug krimen.
Matud ni Libanan nga 42 kanila ang most wanted person samtang 126 usab ang mga regular wanted person og 335 ka mga individual ang nadakpan nga walay warrant of arrest.
Gikadugang pa niini nga ang mga most wanted adunay kaso nga murder, homicide, robbery, rape ug adunay kalambigitan sa gidiling druga.
Samtang ang uban adunay kaso nga nakasupak sa mga ordinansa, alarm scandal ug uban pa.
Misaad si Libanan nga ipadayon ang pakigbatok ug pagpahugot sa pagbantay sa palibot aron mabatokan ang nagkadaiyang mga kriminalidad sa probinsya.
