GENERAL SANTOS CITY – Mukabat na sa 1,813 ang ihap sa mga na stranded nga Overseas Filipino Workers (OFWs) ang nakabalik na sa ilang lugar sa Rehiyon-12.
Matud ni Regional Director Marilou Sumalinog sa OWWA 12 nga ang maong ihap ang natigum gikan niadtong Mayo 26, 2020 dihang miabut ang unang batch sa mga OFW repatriates hangtud Hunyo 4, 2020.
Kahibaluan nga daghang mga OFWs ang nawad-an og trabaho tungod sa pandemic.
Gilayon usab nga nagresponde ang Department of Labor and Employment (DOLE) aron paghatag ug mga livelihood assistance kauban ang OWWA alang sa mga namauli nga OFWs
Samtangan nangayo og pasaylo si Sumalinog sa mga lokal nga gobyerno sa kalibog nga hatud sa pag-uli sa mga OFWs.
Kini gumikan walay ensaktong oras ang pag-abot og ihap kung pila ang sugaton sa matag lokal nga gobyerno.
Matud pa niini nga bisag sila sa regional office ang wala nasayod gumikan walay impormasyon nga gipadala kanila.
Hangyo niini nga unta mas palapdan ang pagsabot sa nahitabo dungan sa pagsalig nga ilang korehian ang sayop nga nahimo.
