GENERAL SANTOS CITY – Nag-imbestiga ang Department of Agriculture(DA)-12 kauban sa National Meat Inspection Service sa tag-iya sa gipalusot nga pork og uban pang meat products nga matud pa usa ka negosyante nga taga Koronadal City.
Sa mga nakalap nga impormasyon sa mga otoridad, nga gasuplay usab ang tag-iya sa pipila sa mga online sellers sa Region 12.
Kahinumduman, aging semana dihang naharang sa quarantine checkpoint sa National Highway Barangay Malungon Gamay, Malungon Sarangani Province ang kapin 2.1 tonelada nga processed foods kasagaran pork products.
Sa gihimong pagsusi, nagkantidad ang produkto og P80,000 nga gikatakda unta nga i-deliver sa Koronadal City, Surallah South Cotabato og Tacurong City,Sultan Kudarat. Gilayon nga gisunog tungod gidudahang kontaminado sa African swine fever (ASF) ilabina nga gikan sa Davao City.
Sa pakighinabi sa Bombo, gibutyag ni Mayor Tessa Constantino, bisan pa nakatutok karon sa pagbantay batuk sa coronavirus disease , nagpabilin ang temporary ban sa pag-transport og live hogs, pork and pork-related food products” pasulod sa Sarangani gikan sa mga lugar nga apektado sa ASF outbreak sa Davao region.
Kahibaluan,ang mga nakumpiskang meat products gikarga sa delivery van kung asa adunay food pass gikan sa Dept. of Agriculture.
