GENERAL SANTOS CITY – Hilabihan kahugot nga gipatuman nga social distancing sa Czech Republic.
Kini ang gibutyag ni Bombo International correspondent nga si April Jay Jayoma, nga taga Malayang Nayon, Mabuhay, GenSan og nagtrabaho karon sa dakong kompanya sa maong nasud.
Gibutyag niini nga sa miaging Marso pa nagpatuman og quarantine dihang natala ang unang kaso sa Covid 19.
Sa karon anaa sa 6,300 ang nagpositibo samtang 166 ang namatay sa sakit .
Dugang ni Jayoma nga kung madakpan nga walay sul-ob nga face mask magmulta gilayon og P60,000.
Sirado ang mga restaurants gawas lang sa kadtong gatanyag og take out orders.
Ang mga botika og groceries ang abli apan ang mga mamalitay ang angayang mutuman sa 1-2 meters social distancing .
Andam ang ospital sa maong nasud nga may 30,000 bed capacity para dalhan sa mga magpositibo sa sakit.
Gimando sa gobyerno ang pagbayad sa mga nawad-an og trabaho sa ilang 100% nga suhulan apan depende sa employer.
Apan ang labing ubos lang nga ihatag 60% sa suhulan sa usa ka bulan ang ihatag sa mga trabahante.
Dili susama sa ubang nasud, sa Czech Republic wala ginapatuman ang paggamit sa quarantine pass kung mugawas sa balay og mamalit og mga panginahanglanon sama sa pagkaon og uban pa.
