GENERAL SANTOS CITY – Tungod sa giatubang karon nga krisis sa nasud kalabotan sa 2019 coronavirus disease, may mga kabag-uhan nga ipatuman ang Simbahang Katoliko sa ilang mga aktibidad.
Sa eksklusibong pakighinabi sa Bombo Radyo GenSan, gibutyag ni Fr. Angel Buenavides, ang vicar general sa Diocese of Marbel, kanselado na ang tanang aktbidad sa Simbahang Katoliko atol sa Semana Santa tumong nga malikayan ang pagkatag sa global pandemic nga covid 19.
Wala nay matigayong Wednesday Sun Down, ginadid-an na usab ang mga apostoles nga magsuroy sa nagkalainlaing panimalay og Seven Last Words.
Apan giawhag ni Fr. Buenavides nga maminaw sa misa nga live nga mapaminawan sa Bombo Radyo GenSan og sa Facebook page sa istasyon alas-6:00 sa buntag matag adlaw nga Dominggo.
Giklaro niini nga wala gisiradhan ang mga simbahan aron bisan kinsa nga muadto ang makapangamuyo apan angayang limitado lamang ang mga tao.
Lakip pa sa mga aktibidad nga dili una ipahigayon ang Station of the Cross, Pahalok sa Cross atol sa Biyernes Santo, Visita Iglesia, ‘Sugat’ atol sa Easter Sunday o Pasko sa pagkabanhaw og daghan pa.
