GENERAL SANTOS CITY – Nagkaproblema na karon ang mga hog raisers sa dakbayan sa pagbaligya sa ilang produkto human nga nakumpirma nga positibo sa African Swine Fever kon ASF ang kasikbit nga mga lugar.
Matud pa kang Dr. Antonio Ephraim Marin ang Department head sa City Veterinary Office nga kini gumikan dili na makaagi ang ilang produkto nga padulong sa Caraga Region og laing mga lugar bisag kompleto sa mga dokomento gumikan sa lockdown nga gipatuman.
Gawas pa niini nga may laing mga lugar na sa Visayas ang nagpagawas og kamanduan nga gidili na ang pagsulod sa ilang dapit og pork products gikan sa Mindanao gumikan sa ASF.
Tungod niini sa pulong nga nahitabo tali sa mga hog raisers og kang Agriculture Secretary William, gipadangat sa mga nasampit ang ilang problema.
Nanghinaut sila nga unta ikonsidera ang hangyo nga magpagawas og kamanduan nga pwede muagi ang mga produktong baboy sa mga dili apektadong dapit sa ASF sa nagkadaiyang mga lugar alang sa ilang destinasyon.
Nabalaka ang City Vet nga dakong epekto sa ekonomiya sa syudad kung makasulod ang ASF.
Kini gumikan sa tibook Rehiyon 12 anaa sa P2.6 billion ang hog industry og P2 billion niini ang natala sa dakabayan.
