GENERAL SANTOS CITY – Gipaniguro ni Kapitan Nicanora Vargas sa Brgy. Bula nga han-ay na ang tanan alang sa kapistahan ni Senior Santo Niño de bula ugma.
Mukapin sien-mil ka pulis gikan sa GSCPO kaabag ang force multipliers og mga barangay tanod ang mubantay alang sa palibot alang sa kalinaw og kahapsay sa kapistahan ingon man magpatunhay sa dagan sa trapiko sa tibuok adlaw.
Gibutyag niini, nakig-alayon na siya kang Kapitan Rock Garay alang sa himuong pagpangandam sa ipahigayong fluvial parade kung asa muagi sa Queen Tuna Park ang imahen ni Senior Santo Niño ugma sa buntag.
Nanawagan si Kapitana Vargas sa tanang mamiestahay nga sundon ang mga patakaran sama na lang sa pagbawal nga magdala og pack bag, mga hinagiban, pusil og uban pang gibawal nga butang.
Hugot nga bantayan sa mga otoridad ang Bula Parish Church nga gilaumang dagsaon sa daghang mamistahay hilabina didto sa gymnasium tapad sa maong simbahan atol sa gabie, kung asa ipahigayon ang tradisyunal nga pagsayaw og Sinulog.
