GENERAL SANTOS CITY – Nanawagan ang mga kabanay kang Pangulong Rodrigo Duterte nga tabangan sila aron gilayong mahatagan ug hustisya ang Pinay domestic helper nga si Jeanelyn Padernal Villavende.
Masuk-anong gibutyag ni Jessa Mae Padernal nga angayan lamang mapanubag ang employer sa iyang ig-agaw human niining gipatay.
Matud pa, nga kung kinabuhi ang gikuha sa ilaha angayang kinabuhi usab ang mahimong bayad niini.
Pipila pa sa mga kabanay sa 26 anyos nga Pinay domestic helper gustong mabitay ang mga amo niini. Kahibaluan nga mibaha ang luha sa pamilya og mga kabanay dihang nahidangat ang patayng lawas ni Jeanelyn kagahapon sa General Santos City International Airport og kini nakabutang na sa kahon.
Sugod karong adlawa ang haya niini sa balay sa iyang apuhan human nga nadala kini sa Brgy. Tinago, Norala, South Cotabato kagahapon gikan sa GenSan og gipailawom ang patayng lawas sa re-autopsy.
Nadesisyunan usab sa pamilya nga itakda sa Enero 23, 2020 ang lubong. Nasayran nga nga lima ka buwan pa lamang nanarbaho si Jeanelyn nga domestic helper sa Kuwait.
