GENERAL SANTOS CITY – Wala na girekomenda sa mga apektadong pamilya nga mubalik pa sa mga naguba nilang balay tungod delikado kaayo para sa ilaha ang sitwasyon.
Matud pa kang Dr. Bong Dacera, action officer sa City Disaster Risk Reduction and Management Office (CDRRMO), naguba ang mga balay sa halos 120 pamilya dinhi sa dakbayan tungod sa kusog og dagkong balud dala sa maut nga panahon sa mga miaging adlaw.
Sa ilang listahan, anaa sa 62 pamilya ang apektado sa Barangay Dadiangas South, 32 pamilya sa Barangay Dadiangas West og 21 pamilya sa Barangay Bula.
Sa miaging Sabado, 25 ka pamilya na ang na-relocate ngadto sa Guardian Hill sa Barangay Bawing ning dakbayan.
Kini na ang maong permanenteng resettlement alang sa mga apektadong pamilya. Matud sa PAGASA, nagmaayo na ang panahon karon apan lauman nga adunay mga pag ulan.
Nagpahimangno usab ang CDRRMO nga posibleng masubli pa ang kusog nga balud sa Sarangani Bay tungod sa nakit-ang bag-ong LPA sa gawas sa Philippine area of responsibility (PAR).
Padayong gitambagan ang mga nagpuyo sa mga danger zone nga i-monitor ang dagan sa panahon, kun adunay nagbahad nga peligro, gilayon nga muhikling aron masiguro ang kaluwasan sa pamilya.
