GENERAL SANTOS CITY – Giduso na sa Philippine National Police ngadto sa Office of the Ombudsman ang kaso batuk sa tulo ka kanhi pulis nga nadestino sa Region 12 kini kalabutan sa dul-an P2 billion investment scam.
Mismong si PNP chief, Gen. Oscar Albayalde, ang nagkumpirma nga gipangkasuhan na silang Col. Manuel Lukban Jr, kanhi Police Regional Office-12 Directorial Staff Chief; Col. Raul Supiter, kanhi City Police Director; ug Lt. Col. Henry Biñas, kanhi Deputy City Director for Administration.
Matud ni Albayade ang kaso sa tulo ang gihuptan sa Office of the Deputy Ombudsman for Military and Other Law Enforcement Offices.
Kini human na-relieve kaniadtong Marso human gialegar nga nalambigit sa investment scheme nga Pulis Paluwagan Movement (PPM), nga nangbiktima ug mga Pulis ug mga residente sa dakbayan ug ubang dapit.
Mukabat usab sa trese ka police non -commissioned officers nga gikan sa General Santos City Police Office ang na relieved gumikan sa scam.
Ang PPM ang gahatag ug 120 percent nga tubo nga gipadagan matud pa ni Shiela Agustin nga gikaingong nakagawas na sa Pilipinas.
