GENERAL SANTOS CITY – Gihikling na ang mga residente sa Barangay Dadiangas West ning syudad human nga gihapak ang mga panimalay sa dagkong balud tungod sa makusog nga pag-ulan sugod kaganihang kaadlawon.
Sumala pa ni Kapitan Aying Acharon sa Dadiangas West nga upat ka purok sa ilang barangay nga gilangkuban sa Purok Tinago, San Vicente, Silway San Roque ug San Juan ang apektado sa mga makusog nga paghapak sa balud kon diin pipila ka balay ang partially damaged ug gihikling sa covered court ning syudad ang mga naapektuhan.
Padayon pa ang monitoring sa City Disaster Risk Reduction Management Office (CDRRMO) sa mga coastal areas sa syudad aron masuta ang katibuk-ang damyos sa mga panimalay nga anaa daplin sa dagat.
Samtang, suspendido ang klase sa publiko o pribado nga tulunghaan sa Gensan ug Alabel Sarangani Province.
Pipila usab ka mga kadalanan ang nakasinati ug pagbaha partikular sa Amao Road Bula ug Yumang St. lakip sa Baluan area sa syudad.
