GENERAL SANTOS CITY – Hugot ang monitoring sa PNP kauban ang AFP sa kalihukan sa New Peoples Army (NPA).
Sa pakighinabi sa Bombo Radyo GenSan, gibutyag ni PLtCol. Aldrin Gonzales, tigpamaba sa PNP 12 nga ang pipila ka lugar sa North Cotabato, Sarangani og Sultan Kudarat ang may presensya sa NPA.
Gikadugang pa niini nga sa area of jurisdiction sa PNP 12 ang North Cotabato ang may kanunay nga insidente nga nahitabo nga hinimuan sa NPA.
Kamatuoran niini gipabusikad sa NPA ang proposed patrol base sa Civilian Armed Forces Geographical Unit (CAFGU) sa Magpet, North Cotabato.
Gibutyag ni Gonzales nga lapad ang area sa North Cotabato nga nahimutang sa utlanan sa Davao del Sur nga may presensya usab sa NPA.
Matud pa ni Gonzales nga kung kanunay nga may operasyon ang militar og PNP sa Cotabato mubalhin sila sa Davao del Sur og mao usab ang himoon kung gigukod sa laing probinsya.
Dili tibook lugar sa North Cotabato, Sarangani og Sultan Kudarat ang may presensya sa NPA.
Sa pamahayag sa maong opisyal nga ang tumong gayud sa gobyerno nga magsurender ang NPA nga daghang tabang ang gitanyag aron mubalik sa sabakan sa gobyerno.
Gikadugang pa niini nga nindot nga magpuyo nga kauban ang pamilya nga malinawon og wala gatago-tago.
Samtang iyang gihingusgan nga sinsiro ang gobyerno sa pagtabang sa mga kanhi NPA members aron mubalik sa normal ang kinabuhi.
Daghang mga livelihood assistance nga gihatag ang gobyerno sa mga nagsurender gawas pa sa mga ihatag kanila nga cash kung may pusil nga dala sa pagtahan sa gobyerno.
Kahibaluan nga bag-ohay pa lamang kapin sa 80 ka kanhi NPA members ang nag-adto sa Hongkong nga giabaga sa gobyerno ang gastos.
Ang gihimo sa PNP ang padayong pakig-alayon sa mga sibilyan og i-edukar ang publiko nga dili maayo nga magsuporta sa NPA nga kapin na sa 50 ka tuig nga gilinla ang katawhan sa ilang gipakigbisogan.
