GENERAL SANTOS CITY – Dili matud pa miyembro sa General Santos City Police Office ang pulis nga nasikop sa entrapment operation nga gipahigayon sa nakalabay nga adlaw human nga nangikil sa usa ka police applicant.
Sa pakighinabi sa Bombo Radyo GenSan, gibutyag ni City PNP Director Col. Aden Lagradante nga anaa sa ilang kustodiya na si Police Chief Master Sergeant Arnel Abellera human kini makasuhan ug extortion ug uban pang kaso kagahapon.
Matud kang Lagradante nga miyembro ang nasampit nga pulis sa Regional Health Service nga nakabase sa Camp Lera dinhi sa syudad.
Nagpasalamat si Col. Lagradante nga maisugong nagsumbong sa mga otoridad ang reklamante nga igsuon sa police applicant nga gikotongan sa maong pulis.
Kahinumduman nga gidakop si Abellera sa usa ka food chain sa Makar Brgy. Labangal GenSan human gikuha ang gitunol sa iyaha nga kuwarta sa reklamante nga taga Quirino Sultan Kudarat.
