GENERAL SANTOS CITY – Galaum ang mga miyembro sa Kabus Padatuon o KAPA Community Ministry International Inc. nga mahidangat ang ilang founder sa prayer rally ning adlawa sa Pedro Acharon Sports Complex sa Brgy Calumpang ning dakbayan.
Kini human sa migawas nga mga reports nga posibleng mutambong si Joel Apolinario og makighiusa sa iyang mga miyembro sa maong panagtigom.
Kini luyo nga walay opisyal nga proklamasyon gikan mismo kang Apolinario kung magpakita sa prayer rally.
Kini tungod hangtud karon, hisgutanan gihapon sa tanan ilabina sa mga miyembro sa KAPA kung asa na kini.
Kahinumduman nga wala na makit-an sa publiko si Apolinario human nga gi-raid sa National Bureau of Investigation og Criminal Investigation and Detection Group (CIDG) ang balay niini sa syudad niadtong Lunes.
Una niini, gikabutyag sa usa ka Xian Gaza sa social media ang matud pa planong paglayas sa nasud ni Apolinario samtang dala ang mga salapi nga gi-invest sa mga miyembro niini.
Samtang plano usab matud pa nga ipdayon sa libuan ka mga KAPA members hangtod sa prayer vigil ang ilang prayer rally ning adlawa.
Nasayran nga nagpalabay ug gabie og sa Acharon Sports Complex na natulog ang gatusan ka mga KAPA members human nga kagahapon pa dihang mahidangat sa Gensan aron mutambong sa prayer rally.
Ang mga nasampit ang gikan sa nagkadaiyang bahin sa Mindanao og pipila niini ang gikan matud pa sa Visayas og Luzon.
Dungan niini, nakataas na ang alerto sa mga otoridad sa dakbayan kung asa kagahapon pa nagdeploy na og mga pulis dungan sa pagbisita ni Pangulong Rodrigo Duterte ning adlawa.
