GENERAL SANTOS CITY – Gina-proseso na sa Bureau of Immigration (BI)-Davao City ang mga dokumento aron ipa-deport balik sa ilang nasud ang gisikop nga walo ka Tsino nga una nang gikustodiya sa kapulisan sa dakbayan aging semana.
Kini human nga napasakaan na og kaso tungod walay paigong permit o unsa mang dokumento nga bitbit sa paghidangat sa nasud.
Gibutyag sa Bombo Radyo ni Joyce Nerona sa BI-Glan, muagi sa pagtaral ang mga dinakpang Chinese national apan unsa man ang mamahimong hukom ang siguradong ipa-deport balik sa ilang nasud.
Giila lamang ang mga nasampit nga silang Chua, Lau, Chan, Chin, Chang, Wang, Zhwaang og Chang.
Kahinumduman nga naaktuhang nag-treasure hunting duol sa baybayon sa Barangay Pinol, Maitum Sarangani ang walo ka Tsino.
Gikabutyag nga gi-salvage sa mga nasampit ang mga bakal gikan sa naunlod nga Japanese vessel kaniadtong World War ll sa lugar.
Hinungdan nga gidakop sa mga ginsakpan sa Coast Guard Maitum apil ang Chinese Barge Dungfu 881 nga ilang gisakyan.
Ang Chinese registered barge nga Dungfu 881 ang gidala na sa Maco Compostela Valley.
