GENERAL SANTOS CITY – Nadugangan na usab ang ihap sa kaso sa pagpamusil-patay sa siyudad.
Labing ulahi ang ex-convict nga giilang si Gabriel Dimalata, 44-anyos, residente sa Prk 3 Rajah Muda, Bula, GenSan, nga mao na ang ika-21 nga biktima ning tuiga.
Nahitabo ang insidente alas-6:50 sa gabii, atubangan sa usa ka tindahan sa nasampit nga lugar. Sa pakighinabi sa Bombo Radyo sa igsuon niini nga si Bartolome, gikabutyag nga igo lamang mipalit ug sigarilyo ang biktima sa tindahan sa lugar.
Nadunggan na lamang niya ang balita nga may gipusil, ug wala nagdahum nga ang iyaha na diay kadtong magulang.
Igo sa ulo ang biktima nga maoy hinungdan sa iyang kamatayon.
Narekober sa crime scene ang duha ka basyo sa bala. Gikabutyag nga tuig 2008 matud pa dihang nabilanggo ang biktima gumikan sa kasong may kalabutan sa iligal nga droga, ug may duha ka tuig na nga gawasnon.
Giangkon usab sa igsuon niini nga nakadawat ug bahad sa kinabuhi ang biktima, nga gituuhan nilang may kalabutan sa kanhing kaso niini.
Sa inisyal nga imbestigasyon, personal grudge ang usa sa mga ginatan-aw nga anggulo sa kapulisan, ug nagpadayon ang gihimong imbestigasyon may kalabutan sa naasoy’ng krimen.
