GENERAL SANTOS CITY – Gipanghimakak sa Securities and Exchange Commission kon SEC ang mga nanggawas nga taho nga nakaangkon ug temporary restraining order kon TRO ang KAPA-Community Ministry International, Inc. batok sa nga Cease and Desist Order (CDO) nga una nang gipagawas sa komisyon batok sa nahisgutang investment scam.
Base sa labing bag-ong advisory nga gipagawas sa SEC, nakadawat matud pa sila ug report may kalabutan sa mikatag nga video sa Youtube nga nagkanayon nga nakaangkon na ang KAPA ug TRO batok sa CDO nga gipanaog sa komisyon batok sa operasyon niini.
Isip pagpaklaro, gibutyag sa SEC nga gi-deny kon gideklarang “DENIED” ni Hon. Presiding Judge Joyce Kho Mirabueno sa Regional Trial Court Branch 58 dinhi sa dakbayan sa Heneral Santos, ang gipasang-at nga mosyon sa KAPA nga mihangyo nga magpagawas ug 72-hour-TRO batok sa CDO.
Hinungdan nga gihingusgan sa komisyon nga nagpabiling EPEKTIBO ug VALID ang CDO nga gipagawas sa SEC batok sa KAPA.
Dungan niini, subling gipahimangnuan sa komisyon ang publiko batok sa pakiglambigit o kaha pag-invest ug salapi sa KAPA.
