GENERAL SANTOS CITY – Duha ang patay apil ang usa ka pulis sulod sa usa ka lawak sa lodge sa Brgy Lagao ning siyudad.
Giila ang namatay nga pulis nga si PO2 Amil Abdulsali, miyembro sa Special Action Force sa Police Regional Office 12, taga-Zamboanga City, samtang ang lain pang usa nga namatay mao ang ama-ama sa iyang asawa nga giilang si Edros Ebrahim, 40-anyos, taga-Banisil ning dakbayan.
Sa inisyal nga impormasyon nga nakalap sa Bombo Radyo GenSan gikan sa Lagao Police Station, nahitabo matud pa ang insidente alas-9:30 kagabii, dihang miresponde ang ilang mga sakop ang sa Carossa Lodge gumikan sa pagpabuto ug pusil sa nahisgutang pulis sulod sa lawak.
Napugos matud pa ang mga miresponde nga pulis nga pabuthan kini, nga maoy hinungdan sa iyang kamatayon.
Samtang, nakaplagan sulod sa pansayan sa lawak ang ama-ama sa iyang asawa nga wala nay kinabuhi.
Base sa mga nanggawas nga impormasyon, anaa sulod sa naasoy’ng lawak sa lodge ang pulis ug iyang asawa nga si Jenicel Alab, 19-anyos ug ang ama-ama niini.
Gikabutyag nga nasuko ang pulis gumikan nasayran nga ginahilabtan ang iyang asawa sa ama-ama niini, butang nga padayon pang ginakumpirma sa mga imbestigador.
Samtang narekober sulod sa lawak ang mga basylo sa bala ug Gloc ug Uzi nga armas.
Mitahan na sa kapulisan ang asawa sa naasoy’ng pulis samtang nagpadayon ang imbestigasyon.
