GENERAL SANTOS CITY – Padayong gapangalap ug impormasyon ang Pendatun Police Station may kalabutan sa pagpusil-patay kagabii sa barangay kapitan sa Dadiangas North ning siyudad nga si Arman Mejia.
Kahibaluan nga dead on the spot ang biktima human gipusil sa nakamotorsiklo nga suspek sa may Bulaong Avenue sa nasampit nga barangay, pasado alas-12:00 sa tungang gabii.
Sa inisyal nga imbestigasyon sa mga imbestigador sa nasampit nga presinto, tulo ka samad-pinusilan sa ulo ug duha sa lawas ang naangkon sa kapitan nga maoy hinungdan sa iyang hinanaling kamatayon.
Gikabutyag nga nakuhaan sa CCTV camera sa lugar ang insidente nga gihuptan na karon sa mga imbestigador.
Sakay matud pa sa motorsiklo ang biktima, samtang ang nag-inusarang suspek nga naka-camouflage ang sakay usab sa yellow nga Yamaha Mio nga walay plaka.
Lima ka empty shells ang narekober sa kapulisan sa crime scene ug kasamtangan pang ginasuta kon unsang matang sa pusil ang gigamit sa suspek.
Sa impormasyon, pauli na unta ang biktima gikan nag-ronda dihang nahitabo ang insidente.
Sa pagkakaron nagpadayon pa ang imbestigasyon sa kapulisan kalabot sa nasampit nga krimen.
