GENERAL SANTOS CITY – Gatusan ka libo gihapon sa mga turista ug bisita ang gilaumang mudagsa sa Kalilangan 2019.
Kini luyo sa mga pag-atake ug pagpamomba nga natala sa ubang bahin sa Mindanao partikular na sa Jolo, Solu; Zamboanga City ug Cotabato.
Hugot na ang pagpangandam sa siyudad kung asa ang City Economic Management and Cooperative Development Office (CEMCDO) ang maoy magdumala sa selebrasyon ning tuiga.
Mag-able ang Kalilangan 2019 sa Pebrero 27 ug sa Marso 3 ang kulminasyon niini.
Gikabutyag nga anaa sa 250,000 ka mga bisita ang gilaumang mubisita ug makigduyog sa Kalilangan 2019, kung asa gipasalig sa General Santos City Police Office ang hugot nga security measures nga ipatuman, sama sa No ID No Entry policy, aron makontrol ang mga gasulod ug masiguro nga mamahimong hapsay ang kasaulugan.
Nasayran nga may bag-o ug pinasahi nga konsepto na ang Kalilangan ning tuiga, kung asa P4 milyon nga budget ang gigahin sa siyudad, apan posibleng madugangan ug muabot sa P8 milyon tungod sa mga sponsors.
