GENERAL SANTOS CITY – Gireklamo sa usa ka pamilya ang Lagao Police Station human na-wow mali ang ilang sakop dihang gironda ang usa ka compound sa Purok Taliban, Buayan ning dakbayan.
Kini sa pagtuo nga didto mitago ang gipangita sa balaod nga si Jonathan Pablo. Sa pakighinabi sa Bombo Radyo, gibutyag sa reklamante nga gisulod sa kapulisan ang ilang panimalay ala-1:000 sa kaadlawon miaging adlaw human gipangita si Pablo.
Matud sa mga nagreklamo, kalit gisipa sa mga pulis ang ilang gate ug gisulod ang ilang panimalay luyo nga walay gipakita nga paigong dokumento, ug nanion ug pusil.
Nanghulga usab matud pa nga patyon ang usa ka miyembro sa pamilya, nagsulti ug dautang mga pulong ug gidapatan ug gisagpa ang usa ka dalaga.
Gatuo pa ang nahisgutang pamilya nga hubog ang mga nasampit nga pulis gumikan nanimaho ug ilimnun.
Nadunggan usab matud pa nila nga nagbutyag ang mga pulis nga mali ang ilang gisulod nga balay. Hinuon, nasayran nga didto dapit nagpuyo ang mga paryente ni Pablo, apan wala na matud pa kini nakabalik tungod sa Sarangani na nagpuyo.
Apan kahibaluan nga na-neutralize na sa kapulisan ang gipangita nga si Pablo, human natultulan sa Sitio Babsa, Sapu Masla.
Matud ni Supt. Teody Condesa, tigpamaba sa Sarangani Police Provincial Office, nakita nga naligo sa sapa ang suspek hinungdan nga nagpahigayon ug operasyon sa lugar.
Misukol matud pa kini sa kapulisan nga nagresulta sa iyang kamatayon.
Kahibaluan nga si Pablo ang gitudlong responsable sa pag-masaker sa tulo ka managsuon sa Malapatan, gawas pa sa pipila ka kaso nga murder, attempted murder, ug uban pa ug gikonsiderang Top 9 Most Wanted Person sa Sarangani.
