GENSAN – Gikatdakdang magpahigayon ug mock elections ning bulana ang Comelec. Sa eksklusibong pakighinabi sa Bombo Radyo kang Atty April Mitsor-Miguel sa Comelec-GenSan, nationwide kining ipahigayon kung asa sa Region 12, duha lamang ka lugar ang napili nga magpahigayon sa naasoy’ng mock election ug usa niini ang GenSan.
Ipahigayon kini sa sa Enero 19, adlaw’ng Sabado, kung asa napili ang Brgy Dadiangas West ug Upper Labay.
Sumala pa nga actual simulation kini sa ipahigayon nga midterm elections sa Mayo ning tuiga, kung asa sama sa tinuod nga piniliay, aduna usay mga balota o test ballots, mga botante, ug mugamit ug VCM, ug i-transmit ang resulta , aron masuta kon gaandar gayud ug maka-transmit ang mga makina.
Gikabutyag nga sa matag area, tig-100 ka mga botante ang musalmot sa mock elections, aron makita ang kapasidad sa makina sa sentro nga bahin sa siyudad, ug sa lagyo nga barangay.
Karong adlawa gikatakdang magpahigayon ug meeting ang Comelec kung asa gipatawag ang mga magtutudlo nga magsilbing board of election inspectors kon BEIs.
