GENERAL SANTOS CITY – Usa ang patay, siyam ang angol sa banggaanay sa pick up ug tricycle sa highway sa Brgy Apopong ning siyudad, Huwebes sa hapon.
Base sa imbestigasyon sa GenSan Traffic Management Unit, parehong ginasubay sa tricycle ug pick-up ang kalsada padulong sa direksyon sa Polomolok, South Cotabato.
Matud ni SPO2 Sembrano sa TMU, hinay ang dagan sa tricycle apan nabangaan kini sa pick up ug naguyod pa ug pipila ka metros ug nangayabo ang mga sakay sa tricycle.
Nasayran nga 10 ka pasagero ang sakay sa tricycle, kung asa gipangsabak matud pa ang mga menor de edad.
Dead on arrival sa balay-tambalanan ang 63-anyos nga si Crestita Nielo nga sakay sa tricycle, samtang ang
driver niini mao si Rolando Gino, nga kasamtangang nagpaalim sa ospital kauban ang lain pang siyam ka pasahero.
Nagpadayon pa ang imbestigasyon, kung asa kustodiya na sa TMU ang mga nalambigit nga sakyanan.
Kahibaluan nga nagpagawas na ug public advisory ang City Disaster Risk Reduction and Management Office, human sa sunud-sunod nga disgrasya sa kadalanan nga natala sa siyudad, kung asa ginalantaw nga posibleng mas madugangan pa, gumikan sa mga selebrasyon nga ginapahigayon samtang nagkaduol ang pagsugat sa Bag-ong Tuig.
Hinungdan nga gipahimangnuan ang publiko nga mahimong responsable ug mag-amping sa kanunay aron malikayan ang mga disgrasya sa kadalananan.
