GENERAL SANTOS CITY – Walay gisayang nga panahon si Filipino boxing legend ug Senator Manny Pacquiao, sa iyang pagpangandam alang kang American boxer Adrien Broner sa Enero 19 sa MGM Grand Arena sa Las Vegas, Nevada.
Human miabot sa Los Angeles kanaidtong Sabado, human makapahulay ug usa ka adlaw, gilayon kining mibalik sa pagbansay ning Lunes, sa unang adlaw sa ikatulong hugna sa iyang training camp.
Ug gani, gilayong nag-jogging ang Pinoy ring icon ug nag-workout sa Griffith Park kauban ang Team Pacquiao.
Sa mga litrato gikan sa iyang team, makita nga kauban pa niyang nag-workout ang kamaguwangang anak nga si Jimuel.
Kahibaluan nga balik usab si Pacquiao sa Wildcard Gym ni Coach Freddie Roach sa Hollywood, apan si Coach Buboy Fernandez gihapon ang manguna sa iyang training.
Ang Pacquiao-Broner bout ang comeback fight ni Pacman sa US, human ang kapin duha ka tuig nga wala kini nakapahigayon ug away sa Amerika.
