GENERAL SANTOS CITY – May kalabutan sa trabaho ang usa sa ginatan-aw sa kapulisan nga hinungdan sa pagpusil-angol sa usa ka traffic enforcer alas-3:30 kagahapon sa hapon, sa Santiago Boulevard kanto San Miguel St. ning dakbayan.
Sa pakighinabi sa Bombo Radyo kang Police Chief Inspector Donald Cabigas, hepe sa Bula Police Station, ang biktima giilang si Gildito Danawan, hamtong ang pangidaron.
Gikabutyag nga ang suspek usa ka lalaki nga naka-bonnet nga sakay sa usa ka motorsiklo.
May ka-istorya matud pa nga tricycle driver ang biktima dihang kalit miabot ang suspek ug gipusil ang biktima.
Maayo na lamang nga natulod sa usa ka tricycle driver si Danawan hinungdan nga tapsing lamang sa liog ang naangkon sa biktima.
Nakadagan matud pa sa Treasury Department ang biktima ug nagtago, kung asa gisundan pa sa suspek ug pusil, apan wala naigo.
Sa karon nagpadayon pa ang imbestigasyon sa kapulisan aron matumbok ang ilhanan sa suspek, ug motibo sa gihimong pagpamusil.
Gilauman nga makakuha ug CCTV footage sa lugar, aron makatabang sa pag-ila sa suspek ug sa imbestigasyon.
