GENERAL SANTOS CITY – Gikumpirma ni Kapitan Boyet Ogan sa Upper Suyan, Malapatan, Sarangani Province nga medyo mihinay na ang gikaingong outbreak sa tipdas sa ilang barangay.
Sa pakighinabi sa Bombo Radyo, gibutyag ni Kapitan nga luyo nga nagpabiling 20 ang natala nga namatay tungod sa maong sakit, may mga adlaw matud pa nga walay gina-report sa iyang buhatan nga may laing kaso sa nataptan sa tipdas.
Sukawhi matud pa kini kaniadto nga halos matag adlaw may ginareport nga pipila ka bag-ong pasyente.
Gikabutyag nga mukabat sa 1,557 ka mga residente nga napabakuhanan human ang gipahigayong mass vaccination miaging semana sa misaka nga medical team sa mga sitio nga apektado sa sakit.
Sa iyang nasayran, kasamtangan anaa matud pay siyam ka pasyente nga nagpabilin sa Diagan Hospital.
Samtang hugot matud pa ang monitoring sa Municipal ug Provincial Health Office sa mga residente aron dili na mukatap pa ang maong sakit.
