GENERAL SANTOS CITY – Upat ka mga sakop sa New Peoples Army o NPA ang gikataho nga napatay sa nahitabong engkwentro tali sa mga sundalo ug mga rebelde sa Upper Suyan, Malapatan, Sarangani.
Base sa taho gikan sa 73rd IB Philippine Army, gikan ang mga napatay sa Guerilla Front 71, nga anaa matud pa ang presensya duol sa lugar kung asa nagpahiagyon ug vaccination program ang mga health workers nga misaka sa kabukiran tungod sa gika-report nga measles outbreak.
Karong adlawa gilaumang mapanaog na ang mga patay’ng lawas sa nahisgutang mga rebelde. Hinuon, wala matud pay natala nga casualty sa bahin sa mga militar.
Kahinumduman nga misakay na ug chopper ang ikaduhang batch sa medical team nga misaka sa lugar alang sa tulo ka adlaw nga mass vaccination human gika-report nga na-stranded ang unang batch sa health workers nga misaka sa lugar tungod sa presensya sa mga rebelde.
