GENERAL SANTOS CITY – Padayon ang pagpasalamat sa Bombo radyo sa tanang mga doktor nga mitabang aron magmalampuson ang Dugong Bombo 2018 niadtong adlaw nga Sabado.
Ang blood-letting activity ang dungan nga gipahigayon sa 24 key cities sa tibuok nasud nga adunay Bombo radyo og Star FM stations kung asa dinhi sa GenSan, gipahigayon kini sa Robinsons Place.
Wala magduha-duha sa paghatag sa ilang panahon ug libreng serbisyo silang Dr. Jett Oco, ang Acting Department Head sa City Health, Dr. Jun Demontaño, ang Presidente sa Rotary Club of Metro Dadiangas, Dr. Ma. Louisa Canda Baliao, Dr. Evelyn Manila, Dr, Jacinto Makilang, Dr. Fe Congson og Dr. Russel Gonzales.
Katambayayong ang PGIS gikan sa GenSan Doctor’s Hospital, sila ang misuta sa mga blood donors una tugtan nga mupailawom sa proseso sa pag-donate ug dugo.
Gipasalamatan usab si Dr. Renato Diagan sa Diagan Hospital og ang GenSan Medical Society sa ilang pagsuporta.
Gipasalamatan usab sa Bombo Radyo ang Philippine Red Cross GenSan and Sarangani Chapter ug ang tanan nilang staffs sa pagpanguna ni Merlita Gludo.
Nakatampo usab sa kalampusan sa Dugong Bombo 2018 ang mga med-tech, medical ug med-tech interns, mga volunteers og mga nurse nga nag-assist sa mga blood donors.
Kahibaluan nga mukabat sa 487 ka mga blood donors ang nahimong kabahin sa nagmalampuson nga Dugong Bombo 2018, usa ka blood letting donation nga gipahigayon sa Bombo Radyo.
Kahibaluan nga gidagsa sa hilabihan kadaghang tao ang maong event nga gipahigayon sa Robinsons Place.
Mukabat sa sa 219, 150 cc kon maitandi sa 219 litro sa dugo ang natigom sa maong blood letting acitivity.
Maitandi kini sa 57 ka gallon kon 1.05 ka drum sa dugo. Dako ang pagpasalamat sa Bombo Radyo GenSan sa mga blood donors og sa tanang misuporta sa sibyahanan aron mahimong malampuson ang maong bulawanong proyekto.
Ang mga successful blood donors ang nakadawat og libreng snack og arrozcaldo nga may nilagang itlog, Dugong Bombo Tshirt og PRC card.
Gipasalamatan usab ang mga medical ug med-tech interns gikan sa Golden State College, Ramon Magsaysay Memorial Colleges og Cronasia Foundation.
Gipasalamatan usab ang tanang mga kumpanya, organisasyon, mga opisyal gikan sa lokal nga panggamhanan sa GenSan og Sarangani nga nahimong sponsors ug partners sa Dugong Bombo 2018.
Ingon man gipasalamatan usab ang kapulisan nga mipartisipar pinaagi sa pag-donate ug dugo.
Samtang, pipila sa mga blood donors ang nagmalipayon tungod sa nadag-an nga appliances og uban pa human sila nabunotan sa gipahigayong raffle atul sa Dugong Bombo.
Na-doble ang kalipay ni Federico Corbo atol sa partisipasyon niini sa nagmalampusong Dugong Bombo 2018 niadtong Sabado.
Kini human nga usa ang nasampit sa nabunotan sa gipahigayong raffle draw atol sa blood donation kung asa nakadaog kini og rice cooker.
Sa pagdawat sa iyang premyo, gibutyag niini nga mas hayahay og gaan ang paminaw sa iyang panglawas human nga nakadonate ug dugo.
Si Crobo ikapito ka higayon nang naka-donate ug dugo sa Dugong Bombo.
Lain pang blood donor nga gi-suwerte human nga nabunotan ang iyang pangalan sa raffle mao si Stephen Gona nga taga Brgy. Poblacion Polomolok South Cotabato.
Matud niini dako ang iyang kalipay nga gikuhaan ug dugo kay siguradong makatabang siya sa uban nga nagkinahang ug dugo.
Sa iyang pahayag, pauli na unta siya human nga nakuhaan og dugo apan gitawagan siya sa iyang inahan nga mubalik sa Robinsons Place human nga ilang nadunggan sa pagpaminaw sa pagsibya sa Bombo Radyo nga gitawag ang iyang pangalan isip winner sa raffle draw.
Nasayran nga daghang nahimong galloner nga blood donors human nga nagdonate ug dugo sa Dugong Bombo sa Bombo Radyo sa daghang higayon.
Nahimong instrumento ang Bombo Radyo aron ipakita sa magtiayong Samyaw nga sila maayong ehemplo sa ilang mga anak sa pagtabang sa isig-kaingon pinaagi sa pagdonate og dugo.
Niadtong adlaw nga Sabado dihang dungan nga nagpakuha og dugo ang mag-asawang Leslie og Dominador Samyaw atul sa gipahigayong Dugong Bombo 2018.
Matud pa ni Mrs. Samyaw, nagsabot gayud sila sa iyang bana nga mupartisipar sa blood donation sa Bombo Radyo. Gibutyag niini, naaghat sila nga magdonate ug dugo human nga niadtong 2015 dihang naghangyo ang iyang ugangan nga magpakuha og dugo, butang nga iyang gituman tungod siya nakasaad.
Sa iyang pahayag, hangtod nga naa pa silay dugo nga mahatag magpadayon silang magtiayon nga magdonate ug dugo.
Gibutyag ni Mr. Samyaw nga nag-half day siya sa iyang trabaho niadtong adlaw nga Sabado aron gahinan og panahon ang pagpakuha ug dugo.
Ang iyang asawa ang nakapaminaw sa Bombo nga adunay ipahigayong blood letting activity hinungdan nga nagkasabot silang duha nga dili palampason nga mupartisipar sa maong bulawanong gimbuhaton nga nahimo na usab nilang panata isip pagtabang sa isig kaingon.
Nasayran nga gihimong “family bonding’ usab sa ubang pamilya ang pag-donate ug dugo atol sa Dugong Bombo 2018.
“For health Reason”. Kini ang gibutyag ni Dr. Laudencio Mendoza, ang provincial dentist sa Sarangani Province nga rason nganong ga-donate siya og dugo matag tuig atol sa Dugong Bombo.
Matud pa niini, may daghang insidente nga may nagkinahanglan ug dugo bisan wala siya makaila iyang gihatag ang iyang PRC card aron makatabang.
Gibutyag ni Dr. Mendoza nga malipay siya nga makabatang sa isig kaingon nga sumala pa niini usa sa ‘purpose’ niya sa kinabuhi.
Sa iyang pahayag, ‘very fulfilling’ usab sa kaugalingon nga may matabangan.
Nasayran nga si Dr. Mendoza, ang gahatag sa iyang panahon og libreng serbisyo atol sa gipahigayon nga Bombo Medico, usa ka dental og medical mission sa Bombo Radyo sa matag tuig.
Gidayeg sa mga doktor, mga opisyal sa gobyerno ilabina sa LGU Gensan og Sarangani, mga first time blood donors, sa mga grupo og organisasyon ang Bombo Radyo sa malampusong pag-organisa sa Dugong Bombo 2018.
Daghan ang nahimong first time blood donors nga malampuson nga nakuhaan ug dugo atol sa Dugong Bombo 2018.
Matud pa ni Rolando Cayanong, usa ka mag-uuma og radio technician nga taga Datal Batong Malungon Sarangani Province dili basta-basta og hilabihan ang iyang kalipay human nga naka-donar ug dugo niadtong adlaw nga Sabado.
Giangkon ni Cayanong nga usa ka Sabadista og niadtong Sabado musimba unta apan nakahunahuna kung unsa ang mas maayong himuon hinungdan nga mas gipalabi ang pag-adto sa Robinsons Place aron magpakuha og dugo.
Sa iyang pamahayag, samtang anaa sa uma permanente siyang gamonitor sa Bombo Radyo gikan sa buntag hangtud gabie hinungdan nga nadunggan ang panawagan sa Bombo Radyo mga suking tigpaminaw nga mag-donate ug dugo.
Gibutyag niini nga nahagit siya nga magdonate ug dugo tungod naghunahuna usab nga dakong tabang kini sa ilang pamilya ilabina na nga manganakay ang iyang asawa.
Nagpasalamat gihapon ang Bombo Radyo sa mga nag-adto sa Dugong Bombo apan na-defer kon wala maka-donate ug dugo human nga pakyas nga makapasa sa gipahigayong pagsusi kanila.
Gipasalamatan usab ang mga ginikanan nga nagkuyog sa ilang mga anak sa venue og giaghat nga mag-donate ug dugo.
Daghan pa unta ang mga blood donors ang miabot apan pakyas nga makadonar ug dugo human wala makapasa sa pre-screening requirements sa blood pressure, anemia, alchohol intake, tattoo, ug ubang rason.
