GENERAL SANTOS CITY – Nanghinaw si Jun Ferolino sa natigayong consultative meeting sa Sangguniang Panglungsod kagahapong adlawa may kalabutan sa isyu sa Kabus Padatoon kon KAPA, sa pagpanguna nilang Kagawad Brix Tan ug Odjok Acharon.
Kahibaluan nga gipatawag ang mga taga-KAPA aron unta pangayu-an ug katin-awan ang ilang presensya sa syudad, apil ang taga-Bombo nga maoy nagmaisugon nga nagdala sa isyu sa KAPA, isip pagpakabana ug pagpakita ug kabalaka sa katawhan nga nailad sa maong investment scheme.
Sa pagpangutana sa mga konsehal, gihingusgan ni Ferolino nga usa lamang siya ka ordinaryo nga miyembro sa KAPA ug dili coordinator, hinungdan nga si Joel Apolinario ang angayang mutubag sa mga pangutana.
Apan kahibaluan nga ang pagpaila-ila sa grupo kaniadto kang Ferolino mao matud pa ang overall leader ug organizer sa KAPA alang sa GenSan ug Sarangani.
Ug gani, kauban usab si Ferolino ni Apolinario kaniadtong mianhi sila sa sibyahanan kauban ang uban pang alipores, aron magpaklaro kalabot sa KAPA, ug nagpakita pa ug dili maayong batasan nganhi sa mga staff sa Bombo Radyo.
Gikatakdang subling ipatawag sa konseho ang taga-KAPA alang sa ikaduhang hugna sa consultative hearing, luyo nga wala pay eksaktong petsa.
Lakip usab sa gikatakdang imbitahan mao ang taga-NBI, BIR, CIDG, ug uban pang ahensya, aron masuta ang pagka-lehitimo sa KAPA.
Kahibaluan nga una nang gipasigarbo sa mga taga-KAPA nga rehistrado sila sa Security and Exchange Commission, apan nasayran nga kini isip pagka-ministriya lamang ug wala silay katungod nga mangolekta ug investments.
Samtang, kahibaluan nga base sa masaligang informant sa Bombo, gikabutyag milupad na padulong sa Kauluhan si Apolinario kagahapong adlawa sakay sa PAL flight 454 Gensan to Manila.
