GENERAL SANTOS CITY – Padayon ang pagpangalap sa kapulisan sa Polomolok Municipal Police Station sa sunud-sunod nga nahitabong pagpamusil sa ilang area of responsibility sukad kaniadtong Biyernes hangtod kaniadtong Sabado, kung asa tulo ka biktima ang napatay.
Kahibaluan nga sa impormasyon gikan kang P/Supt. Jose Marie Simangan, hepe sa nasampit nga presinto, robbery with homicide ang nahitabo dihang gipusil ang biktima nga si Samson Baladec, 39-anyos, tindero ug gulay, residente sa Prk Pagkakaisa, Brgy Lumakil, Polomolok.
Gikabutyag nga pauli na unta ang biktima sakay sa multicab kauban ang iyang misis, apan pag-abot sa ngit-ngit nga lugar, giharangan sila sa upat ka lalaki nga nakamotorsiklo ug nagdeklra ug holdap dayon gipusil ang biktima.
Malampuson pang nakuha ang P10,000 gikan sa misis, dayon paspas nga misibat.
Samtang alas-12:00 sa udto kaniadtong Sabado gipusil-patay usab ang purok chairman sa nasampit gihapon nga purok ug barangay, kung asa ang biktima giilang si Randy Bisaya.
Gikabutyag nga samtang nagmaneho sa iyang motorsiklo, kalit kining gipusil sa nakamotorsiklo sa suspek, rason sa iyang hinanaling kamatayon.
Samtang ang laing biktima giilang si Lisier Ayao, 36-anyos, residente sa Prk 2 Brgy Rubber, Polomolok.
Sakay matud pa ang biktima sa iyang tricycle ug pauli na unta dihang gisundan ug gigukod sa nag-inusarang suspek nga sakay sa motorsiklo.
Pag-abot sa nahisgutang lugar, nakasulod matud pa sa usa ka balay nga gipanag-iyahan sa Pamilyang Ofamin ang biktima, apan gigukod gihapon sa gunman ug gipusil.
Misulay pag dagan ang biktima apan nakabsan gihapon sa kinabuhi.
Gikabutyag nga gituuhang personal grudge ang motibo sa nahisgutang pagpamusil. Kahibaluan nga unom na ang natala nga gipusil-patay sa area of responsibility sa Polomolok Municipal Police Station, sukad sa paglingkod ni Supt. Simangan miaging bulan isip hepe.
Hinuon, gipasalig sa nahisgutang opisyal nga ginahimo nila ang tanan alang sa pagkasulbad sa nahisgutang mga kaso.
