GENERAL SANTOS CITY – Ning adlawa ang gikatakdang engkwentro sa GenSan boxer nga si Randy Petalcorin batok kay Felix Alvarado sa Nicaragua nga ipaghigayon sa Midas Hotel and Casino sa Roxas Boulevard sa Kauluhan.
Kahibaluan nga pulos sulod sa catchweight ang duruha sa gipahigayong weigh-in kagahapon. Si Petalcorin ang anaa sa 108 pound samtang si Alvarado ang anaa sa 107 pounds alang sa IBF World Light Flyweight championship.
Una nang gibutyag sa Bombo Radyo ni Lady Manalo, labaw sa GenSan City Sports Division nga kumpiyansa siya nga modaug si Petalcorin gumikan sa katakos niini human ang gihimong hugot nga pagpangandam ug pagbansay alang sa maong away.
Si Petalcorin adunay record nga 28 ka daog, 22 ka Knockout, duha ka pildi, ug usa ka draw, samtang si Alvarado may 33 ka daog, 29 ka KO, ug duha ka pildi.
